Faglegt efni
Human Capital Trends 2019
Leading the social enterprise: Reinvent with a human focus
Um 10.000 stjórnendur, þar af um 500 stjórnendur á Norðurlöndum, tóku þátt í nýjustu mannauðskönnun Deloitte „Human Capital Trends 2019“.
Skýrsla ársins fjallar um áskoranir og tækifæri sem felast í framsæknum stjórnarháttum, fyrirmyndar mannauðsstjórnun og virkri samfélagslegri þátttöku fyrirtækja. Skýrslunni er skipt upp í þrjá meginkafla; framtíð vinnuaflsins, framtíð fyrirtækisins og framtíð mannauðsmála.
Þegar niðurstöður á alþjóðavísu eru bornar saman við niðurstöður Norðurlandanna má greina mun á stefnu fyrirtækja á Norðurlöndum og annarra landa. Eru Norðurlöndin að ryðja veginn með vinnumarkað sem aðlagar sig að breyttum veruleika og kröfum starfsfólks eða eru þau að reka lestina í þeim efnum?
Framtíð vinnuaflsins
Í áraraðir hafa margir talið vertaka, lausamennsku- og sjálfstætt starfandi einstaklinga vera óhefðbundið vinnuafl. Þessi tegund vinnuafls hefur þó á undanförnum árum rutt sér til rúms og í dag tilheyrir stór hluti einstaklinga á vinnumarkaði þessum hópum. Fyrirtæki þurfa að aðlaga sig að breyttum vinnumarkaði og íhuga hvernig nýta megi fjölbreytni vinnumarkaðarins til þess að hámarka árangur.
Kaflinn um framtíð vinnuaflsins tekur á þremur þáttum:
- Óhefðbundið vinnuafl er orðið hefðbundið
- Frá störfum til „súper“-starfa
- Leiðtogar 21. aldarinnar
Kröfur og væntingar til leiðtoga
Rúmlega 80% stjórnenda á alþjóðavísu telja að leiðtogar 21. aldarinnar standi frammi fyrir nýjum kröfum og áskorunum á vinnumarkaði. Nokkur samhljómur er um hvaða kröfur það eru en þó gætir örlítils áherslumunar milli stjórnenda á Norðurlöndum og í öðrum heimshlutum. Súluritið hér að neðan varpar ljósi á þá þætti og muninn milli Norðurlandanna og heildarinnar.
Framtíð fyrirtækisins
Samkeppni um hæfileikaríkt og öflugt starfsfólk er áfram mikil auk þess sem hæfniskröfur breytast hratt. Aukin áhersla er á hið mannlega og vill starfsfólk finna að það skipti máli og hafi áhrif, ekki aðeins á fyrirtækið heldur líka samfélagið í heild.
Kaflinn um framtíð fyrirtækisins tekur á þremur þáttum:
- Mannlegi þátturinn
- Áhrif liðsheildar á frammistöðu fyrirtækja
- Hvatakerfi
Teymisvinna og þverfagleg vinna er algengari á Norðurlöndum
Þriðjungur stjórnenda á Norðurlöndum nefndi að á þeirra vinnustað væri unnið alfarið eða að mestu leyti í teymum, samanborið við fjórðung stjórnenda frá öðrum heimshlutum. Þá sögðu 64% stjórnenda á Norðurlöndum að enn væri algengt að leiðtogar hreinlega kunni ekki að reka fyrirtæki þar sem unnið er í teymum eða þverfaglega og það sé helsta ástæða þess að fyrirtæki séu treg til breytingar í þessa átt.
Framtíð mannauðsmála
Mannauðsmál eru að breytast hratt og hafa sívaxandi áhrif á fyrirtæki og þróun þeirra.
Kaflinn um framtíð mannauðsmála tekur á fjórum þáttum:
- Nýráðningar
- Símenntun
- Starfsþróun innan fyrirtækja
- Skýjalausnir og sjálfvirknivæðing
Sjálfvirknivæðing mikilvægari á Norðurlöndum
Að mati 71% stjórnenda á Norðurlöndum verður sjálfvirknivæðing stærsta breytingin í mannauðsmálum, samanborið við 56% stjórnenda á heimsvísu. Áréttað skal að þrátt fyrir að sjálfvirknivæðing og skýjalausnir auðveldi vinnslu gagna þá ætti aðeins að líta á þær lausnir sem grunn til að byggja ofan á - þær koma ekki í stað þeirra greiningar sem mannauðsstjórnendur vinna í dag.